background

آسيا؟! لا مش لاعب

May 11, 2016 Volunteering

البلد الاولة، بنجلاديش

بذمتكم، حد قبل كده فكر يروحها، مافتكرش. احب اقلكم ان البلد ديه فيها مناظر طبيعية جامدة بس ومحدش يعرف عنها حاجة.

من الحاجات اللي مش هتشوفها الا في بنجلاديش بس هو النمر الابيض. النمر ده بيتميز بأن صوت زئيره بيتسمع من بعد 3 كيلو

شكلكم لسه مقتنعتوش، استنوا بقى و شوفوا اللي جاي!!



البلد التانية، كامبوديا 

لو اتكلمنا عن كامبوديا، لازم نجيب سيرة الافراح هناك. المعروف عن الناس ديه انهم فرحنين على طول، و لذلك الافراح بتعتهم هي اطول افراح في العالم و ممكن تمتد لمدة ثلاثة ايام!!!

حاجة كمان لازم تعرفوها عن كامبوديا هي ان الناس هناك نادرا ما بيحتفلوا بأعياد ميلادهم، لدرجة انهم بينسوا سنهم كام اصلا.

و الله بلد غريبة، بس حلوة.



نخش على البلد التالتة، كازاخستان

بيسمموها "بلد العجايب" اكيد مش من فراغ، اظن ان لو عرفنا ان اللي في الصورة ديه اكبر بحيرة في العالم و موجودة في كزاخستان هنغير رأينا تماما عن موضوع السفر.


الفكرة اننا بنعتمد بس على الحاجات اللي بنسمعها عن البلاد، فعلشان الناس اصلا مبترحش البلاد ديه، عمرهم ماهيعرفوا سر جمال و اختلاف كل بلد عن التانية.

ليه دايما بنفكر نروح البلد اللي غيرنا رحوها، علشان نشوف حاجات هما شفوها؟ ساعتها هترجع و تحكيلهم عن رحلتك، بس مش هتلاقي منهم الحماس اللي انت مستنيه. لكن تخيل كده لو سفرت بلد عمرهم ما سمعوا عنها و رجعت حكتلهم عن قد ايه كانت رحلة مختلفة، على الاقل هتلاقي حاجة تغيظهم بيها و تخليهم يندمو الف مرة انهم ماكانوش معاك.

عايز رأيي؟ بلد سمعت عنها من صحابك تعتبر روتين.

و على رأي الحكمة اللي بتقولك

"اذا كنت تعتقد بأن المغامرة خطرة، فجرب الروتين فهو قاتل"

من النهردة لما تيجي تفكر في السفر، آخر حاجة تفكر فيها هيا البلد اللي هتروحها. اهم حاجة لازم تتأكد من وجود المغامرة في رحلتك حتى لو البلد مش موجودة على الخريطة اصلا.

انا رحت الهند, ياتري انت هتروح فين ؟؟؟؟